(1903) La fiesta de Santiagu en Llangreo
Non ye pal qu' abaxo firma
(home de poca mollera)
escrebir, mal y torcío
pa rellatar ista fiesta.
Y dígolo francamente
que miyor que de poeta,
ficiera de zapateru
ó d' utru oficiu cualquiera.
Pero non pue remedialo
quien contiempl' una praera
tan maja, con farolinos
al estilu de Vinecia.
Y al oyir la musiquina
en sin rival é na tierra
tocar tan amorosino,
qu' al alma más triste alegra.
¡Qué fogera, Virxen Santa!
alli n' aquella campera
allumada con faroles
y focos de lluz iléctrica,
víense blanques neñines
con cariquines de cera
llocir so 'strecha centura,
tan ceñía y tan bien fecha,
que 'l torneru más agudu
rompiérase la mollera
pa facela tan reonda,
tan monina y tan perfeta.
Hay rapaza per Llangreo
que golvi llocu á cualquiera
pos hay cara que paez
que tá diciendo... ¡comeila!
Bien lo conoz Josepan
que cuando llistu ximielga
los palíos del tambor
pa que baile la reciella;
al ver una neña guapa,
él toca y mira la neña
con unos güeyos el probe
que paez que quier mordela.
Bona fartura coyó
de tocar... más de milenta
y mil y picu neñes,
toes puestes en ringlera
ca una con so mozucu
reblincaben con presteza,
sin facer casu malditu
que á Josepan i corriera
el sudor ya pe les ñarres
á goteres con tal juerza,
cual si les ñarres de Pan
foran una regadera...
Tres dies xustos de festexos;
volaores de culibera
y d'isos que van xiblando;
sidra, refrescos, cirveza,
fabes, llacón y focicu,
gaita, baile y pandereta,
zanfoníes, organillos,
bombos, platillos, ecetera
Y alluego la procisión
y el bollu, con so botella
d' un vinin... (non lo probé)
de Xerez de la Frontera.
Los fuegos arteficiales
non valieron una perra
fu... fu... fu... fu... y acabóse,
y dalgunos al dar güelta
necesitaron gabita,
como 'l carro de Garciella
cuando los güés tienen fame
y va subir una cuesta.
Fuxeron per el ispacio
globos de munchos sistemas;
hubu unu toi 'sparnau
ripresentando á Silvela.
Utru col coco pintau
y Villaverdi 'n chancleta
fuxendo desesperadu
per 'rriba d'una portiella.
Utru col de San Bernardu
metiu nuna puchera
dando güeltes a una boina
col rabu d' una garciella.
Y utru co nun neñu flacu
con corona 'n la cabeza
fuxendo pe los 'spacios
montau nuna 'scopeta.
En custión de Merenderos
llucióse de cuayu 'l Guerra
y el llamau de les Delicies
que llevaron la palmeta.
Nel Tiatro, tóos bien
distinguiéndose las neñas
y en la Praviana cantó
devínamente Valienta.
Y de los homes, ta Campa
y ta Xuaquín, que 'n concencia,
son atores consumaos
que valen munchas pesetas.
Y Toribio sí dexase
la navaya y la tíxera
utru gallu-í cantaría
porque nació pa la 'scena.
De Sixto, non digo na
vál, ye verdá! lo que pesa,
y hay que oyílu cantar bien
cuando non tien carraspera.
Y agora pa dar remate
al deseñu d'esta fiesta,
voy á palmiar á Pedrosa
quitándome la montera:
Y dirixir a les neñes
una flor: ¡Bendites sean!
igual morenes que rubies
trastornen á cualesquiera.
Son muy guapes mios paisanes,
en ve' de neñes, son pelras,
si hay quien diga lo contrario
que baxe Dios... y lo vea.